Kancinci kancinci Spurs siyasuka ezembeni
URelebohile Mofokeng nongumdlali oselula kwi-Orlando Pirates ufake inqaku ngomzuzu weshumi nesibini ngaphambi kokuba uGadiel Kamagi weCape Town Spurs ufake elokulinganisa ngomzuzu wamashumi asixhenxe anesihlanu kumdlalo weDstv Premiership e-Orlando Stadium ngoLwesithathu.
La maqela agqibela ukujongana ngoNovemba ka-2023 ,nalapho iCape Town Spurs yaphumelala ngo 2-0 bephumelela imdllalo wabo wokuqala wesizini.
Ifolosi uTshegofatsa Mabasa uqale umdlalo wakhe wokuqala kwiPirates emva kokujoyina eliqela laseMayfair esuka kwiMoroka Swallows. Engena endaweni ka-Evidence Makgopa ongakhange abekho kulomdlalo.
Olunye utshintsho lwezimnyama u-Innocent Maela noNkosinathi Sibisi bangene endaweni ka-Olisa Ndah noDeon Hotto.
UMofokeng oneminyaka eli-19 ubudala udlale indima ebalulekile kwiSea Robbers kulesizini ithe wafaka inqaku lokuqala kulo mdlalo ngesiqingatha sokuqala.
Umdlali odlala emva uKamagi obolekwe kwiqela laseTanzania iSingida ufake inqaku lakhe lokuqala lonto yenza lamaqela adlale ntanganye.
ISpurs iwuqale kakuhle unyaka omtsha emva kokutsala nzima kwisiqingatha sokuqala sesizini. Kwimidlalo emithathu yeligi, baqokelele amanqaku asixhenxe kwalithoba.
Bawuvala umsantsa ukusuka kwindawo yeshumi elinesihlanu bashiya ngasemva iRichards Bay FC ngamanqaku amabini emva kokuqokelela amanqaku alishumi elinanye. Balelwa ukusuka endaweni emasikizi apho kubonakala bezakutyiwa lizembe.
Ezinye iziphumo zeDstv Premiership IChippa United ibethe iRichards Bay FC ngo 3-0 ebeyidlala ngabadlali abalishumi eNelson Mandela Bay Stadium. UJustice Shabalala, uCraig Martin kunye noKayden Francis bafake amanqaku.
ISekhukhune United iphumelele umdlalo wesithathu ngokulandelelana njengoko boyise iRoyal AM ngo 1-0 ePeter Mokaba Stadium.
