ISundowns ivule umsantsa kwiSuper League
IMamelodi Sundowns Ladies ivule umsantsa wamanqaku amabini phezulu kwiHollywoodbets Super League, kulandela ukuphumelela kwayo ngo 2-0 kwi-University of Johannesburg (UJ) kungquzulwano oluphezulu kule mpelaveki.
UChuene Morifi uye wafaka inqaku elivulelekileyo ngelixa umdlali omtsha uCimone Sauls efake igowuli lakhe lokuqala kwiSundowns eLucas Moripe Stadium, njengoko iintshatsheli ezikhuselayo ziphumelele imidlalo emithathu ilandelana nto leyo ebabeke encotsheni ngamanqaku alithoba. I-UJ yehlele kwindawo yesone ngamanqaku amathandathu kwimidlalo emithathu.
Indawo yesibini kule veki ibanjwe yiCopperbelt Ladies emva kokuphumelela ngo 2-1 bedlala ne-University of Fort Hare. Eli qela laseLimpopo libambene ngamanqaku asixhenxe neRichmond United ekwindawo yesithathu emva kokuba iphumelele ngo 2-1 idlala neTUT Matsatsantsa Ladies e-De Aar.
IFort Hare yehle yaya kutsho kwindawo yeshumi elinanye ngelixa iTUT ikwindawo yeshumi elinesibini ngamanqaku amathathu.
Ngeli xesha iJVW ibhalise impumelelo yayo yokuqala kule sizini, iphumelele ngo 1-0 ibetha i-University of Western Cape (UWC) kumdlalo olityaziswe ngeeyure ezimbini, ngenxa yokucinywa kombane eSoweto ngoLwesihlanu. IBlue Diamonds ikwindawo yeshumi elinesithathu ngamanqaku amathathu, ngelixa iBlues ikwindawo yesithoba ngamanqaku amane kumdlalo wayo wesithathu.
Ezinye iziphumo:
Lindelani Ladies 1-3 University of Pretoria
Royal AM 1-2 TS Galaxy Queens
Thunderbirds Ladies 1-4 City Lads
Durban Ladies 2-1 First Touch Academy
