ISundowns ibethe iSpurs ngepenalthi engaginyisi mathe
Iphumelele ngenqaku elikhwinisayi iMamelodi Sundowns idlala neCape Town Spurs kumdlalo weDStv Premiership obuse-Athlone Stadium eKapa ngoLwesibini ebusuku.
ISundowns ibonakale ixhamla kwisigqibo sikasompempe uThabo Mkhabela ebesimixholo kwimizuzu emihlanu phambi kokuphela kwesiqingatha sokuqala. UMkhabela unyole apho kufele khona ithole ngethuba u-Asenele Velebayi ebonakale edlalisa kakubi uPeter Shalulile kwindawo ngathi ebungaphandle nebhokisi.
Usompempe wayikhomba emlotheni, akazange uLucas Riberio aphuzise amaseko njengoko elithathele ngakuye ngomzuzu wama-42 nto leyo edanise umqeqeshi weSpurs u-Ernst Middendorp.
Lo mqeqeshi oyinzalelwana yaseGermany uqubisene namagosa omdlalo njengoko ibiphuma isiya kumagumbi okutshintsha ngekhefu.
ISundowns ayiphumanga ekuthetheni kwakhona njengoko neYanga yaseTanzania ikhalela ibhola ekuthiwe ayingenanga yiVAR kumdlalo weCAF Champions League.
Umdlalo ubusoloko ucalanye njengoko iSundowns ibiphethe ibhola namathuba. Iqela lasekhaya, elize kumdlalo emva kokubethwa kabini, liye lasokola ukuhlanganisa ibhola kwiqela elingekabethwa phantse imidlalo engama-20.
I-Spurs ayizange ibe nethamsanqa, nangona kunjalo, yokungafumani inqaku lokulinganisa kwimizuzu ngaphambi kokuphela xa befaka uxinzelelo kwiindwendwe. Umhlaseli u-Ashley Cupido usondele ekubetheni uRonwen Williams ephuma kwikona kaKeagan Buchanan kodwa ibhola yakhe yabetha ngqo.
Le ibiyimpumelelo yeshumi elinesithandathu yeSundowns. Lo nto ithatha ukuba xa iSundowns inokuphumelela imidlalo emine ingaba ziintshatsheli kwakhona. Kodwa isalindwe kukudlala neStellenbosch FC kwimidlalo elishumi eseleyo.
KuRulani Mokwena, le mpumelelo ithethe ukuba ugqibe imidlalo yeligi engama-44 engakhange oyiswe ukusukela oko waqeshwa eyedwa njengomqeqeshi weSundowns ngo-Okthobha ka-2022.
Akukho qela eMzantsi Afrika eligqibe isizini lingabethwanga kodwa ukuba iSundowns iyawugcina umxhelo wayo ingalophula nerekhodi ngoMeyi.
