Sizakugqibezela umsebenzi esawuqala eTunisia -Oussema Bouguerra
Iintshatsheli izihlandlo ezine e-Afrika, i-Esperance de Tunis, ifike eMzantsi Afrika ngentseni yangoLwesithathu kwaye kwangoko yabhengeza ukulungela kwayo ukuya kumdlalo wokugqibela weCAF Champions League.
Eli qela laseTunisia laphumelela ngo 1-0 lidlala neMamelodi Sundowns kumdlalo wokuqala wempelaveki edlulileyo, kwaye kufuneka ziphephe ukoyiswa kumdlalo womlenze wesibini wamagqibela kankqoyi eLoftus Versfeld Stadium.
Ethetha namajelo eendaba asekhaya phambi kweseshoni yabo yokuqala yoqeqesho kumabala emidlalo eTuks ePitoli, umhlaseli u-Oussema Bouguerra uthe nangona indlela yabo eTunis kwiveki ephelileyo yahlukile, bazimisele ukwenza nantoni na efunekayo ukuze banyuke iqhina.
“Sadlala kakuhle eTunisia kwaye size apha ukugqiba iqhina. I-Inshallah siya kuzama ukuphumelela kwaye siqhubele phambili kumdlalo wokugqibela, “utshilo uBougerra ngomguquleli wesi-Arabhu.
“Asizange sidlale ngokwahlukileyo eTunisia, kodwa senze umsebenzi wethu kwaye yiyo loo nto siye safaka inqaku apho. Umdlalo ngamnye une [dynamics] yawo, silapha ukugqiba umdlalo kwaye siphumelele inshallah.”
Ngaphambili u-Esperance wayingcamla impumelelo kwiSundowns ePitoli – iphumelele ngo 2-1 ngo-2017 ngexesha lomqeqeshi wangaphambili uPitso Mosimane, kodwa uBougerra uthi bakhuthazekile ngoku ukuya kumdlalo wokugqibela.
“Silazi kakuhle eli qela leSundowns kwaye siyayazi ukuba singaphumelela apha, iEsperance inesiko nenkcubeko yolu khuphiswano, yiyo loo nto silapha ukuze siphumelele,” wongeze watsho lo mdlali oneminyaka engamashumi amabini anesihlanu ubudala.
“Ndicinga ukuba le yeyona ntshukumisa ibalaseleyo kuye nawuphi na umdlali odlala kwiChampions League, odlala kumdlalo owandulela owamagqibela kankqoyi kwaye enethemba lokudlulela kumdlalo wokugqibela-ibaluleke kakhulu kuye wonke umdlali.”
