“Ayiyo Orlando Pirates esiyaziyo le”

Imicelimngeni ejongene nomqeqeshi omtsha we-Orlando Pirates u-Abdeslam Ouaddou icaciswe emva kokuba iingxilimbela zaseSoweto ziqale ugqatso lobuntshatsheli beligi ngokubethwa.

Amawakawaka eBucccaneers ayishiyile i-Orlando Stadium edanile ngoMgqibelo emva kokubethwa ngo’1-0 kweBetway Premiership iqela elidlalela iSekhukhune United.

Isiqalo esibi bekungalindelwanga xa kujongwa umgangatho wabadlali abasayiniweyo ngaphandle kwesizini, kunye nesiqalo sempumelelo kwiMTN8 kwiintsuku ezisixhenxe ezidlulileyo.

“Ndandiphoxekile. I- Pirates ibonakala ibuthathaka. AyiyoPirates esiyaziyo,” ivuma ngelitshoyo ingqalabutho yebhola yasekuhlaleni uMlungisi Ngubane.

“Mhlawumbi bacinga ukuba abadlali abatsha bangangena endaweni yabadlali abebengekho ngobusuku, kwaye bafumanise kunzima ukuba akuzukuba lula.

“IPirates liqela elikhulu, awunakusuka nje uthathe umfana omncinci njengoTshepang Moremi osuka kuMaZulu FC, osemtsha kule ligi, ulindele ukuba afake amanqaku kwiPirates.

“Awukwazi nje ukuza apho ubambe indawo ka-Mohau Nkota. Laa nkwenkwe yasebenza nzima kweso sikhundla.

“Kodwa mhlawumbi sibaqhelile abadlali abafana noMakhehleni Makhaula noThalente Mbatha.

Abo ngabona badlali basesiswini abomeleleyo kwiPirates,” utsho njalo.

‘UProfessor’, njengoko ethandwa, uthi nangona abadlali abatyikitywe zizigebenga zaseSoweto bekumgangatho obalaseleyo, basafuna ixesha lokuziqhelanisa.

“Ngokuphathelele kwiPirates ethengisa abadlali bayo ababalaseleyo, ndiphoxekile, iPirates akumelanga ukuba ithengise abadlali bayo kuba inemali yonke.

“Bekunyanzelekile ukuba babagcine bonke aba badlali ababathathe baye kumdlalo owandulela owamagqibela kankqoyi weCAF Champions League kwisizini ephelileyo.

“UBoitumelo Radiopane unikwe ithuba elaneleyo, kodwa akabonakali, ijezi yePirates inzima kakhulu kuye, kwaye ngenxa yoko, nguRelebohile Mofokeng osokolayo.

“U-Oswin Appollis ngumdlali olungileyo, kodwa naye akakaqhubi njengoNkota, mhlawumbi i-advanteji kaNkota kukuba uchithe ixesha kwiqela lePirates iDDC, u-Appollis no(Sipho) Mbule badlale kakuhle ngoMgqibelo, kodwa le yiPirates, silindele lukhulu.

FUNDA KWAKHONA :Abadlali be Chiefs abaqalayo ukuhlaziya

“Asizazi izizathu ezibangele ukuba abadlali abaqhelekileyo bangabikho, kodwa ndiyathandabuza ukuba umqeqeshi ubaphosile ukuze anike abadlali abatsha indawo.

SIFUMANE KUFACEBOOK :Imidlaloyoluntu.facebook.com

Kuye kwanyanzeleka abadlale ngoba abadlali besiqhelo bebengekho,” utshilo uNgubane.