U-Broos Ucatshukiswe zingcaciso zikaMokwena zokwenzakala kwabadlali zakutsha nje
Umqeqeshi weBafana Bafana, uHugo Broos, uvakalise ukungoneliseki kwakhe ziintetho zamva nje zikaRulani Mokwena ngabadlali bakhe beMamelodi Sundowns abaseneengxaki zokonzakala ukusukela kwi-Africa Cup of Nations.
UMokwena kuye kwanyanzeleka ukuba alungelelanise ukudibanisa abadlali bakhe beBafana, njengoko abadlali abafana noKhuliso Mudau, Mothobi Mvala noThapelo Maseko, ababuye benzakele kwitumente.
Emva kokuphumelela kweSundowns ngo 2-0 idlala neMaritzburg United kumdlalo weNedbank Cup, uMokwena uye wadiza ukuba unozinti uRonwen Williams unengxaki yegxalaba lakhe ukusukela kwi-Afcon, logama uTeboho Mokoena ekhathazwa lidolo ukusukela kwitumente.
“URonza uyasokola egxalabeni kwaye sinomdlalo onzima kakhulu weChampions League, uTebza uyasokola edolweni kwaye ebenawo ukusukela kwi-AFCON. URonza ubenegxalaba ukusukela kwi-Afcon,” utshilo kwiintatheli emva komdlalo.
“Kwaye kuphela ngoku sifumene uMothobi kunye noSailor babuyile. Kodwa sisenengxaki noMaseko, owafumana umonzakalo nakwi-AFCON.”
Uqhube waqinisekisa ukuba uWilliams noMokoena baphumle xa bedlala neMaritzburg, kodwa kusengenzeka ukuba bahambe neBafana ukuya e-Algeria.
“Baye baphumla ngenxa yokuba benokwenzakala ngokunyanisekileyo, kwaye yinyani leyo,” wongeze watsho.
“Ingaba bomelele ngokwaneleyo ukuze bangabikho kwiBafana? Andazi kuba ndicinga njengeqela besisoloko silixhasa iqela lesizwe. Ngalo lonke ixesha, rhoqo, rhoqo kwaye siya kuqhubeka sikwenza oko. ”
Njengoko abadlali beSundowns neSuperSport United besasendleleni eya e-Algeria ukuya kumatanisa neqela lesizwe, uBroos ubuzwe ukuba akukho nto ayivileyo kusini na ngokwenzakala kukaWilliams noMokoena.
Nangona kunjalo, ingcaphephe yaseBelgium iphendule ngelithi igqiza loogqirha beBafana alikafumani mbalelwani esuka kwiSundowns, ngoko ubathatha njengabafanelekileyo abadlali.
“Ukuba ngokwenene bonzakele, kufuneka basazise kwaye bangathethi noonondaba kwaye babaxelele ukuba bonzakele,” uphendule watsho uBroos.
“Ndicinga ukuba sinogqirha. Bayazi ukuba sinogqirha, banenombolo yomnxeba kagqirha, ngoko kutheni bengasibizi kwaye basinike ingxelo yezonyango?
“Abayenzanga loo nto, oko kuthetha ukuba bafanelekile, ndiyaxolisa kakhulu, andikwazi ukuqhubeka ndithetha ngomqeqeshi uRulani kwaye mhlawumbi nomlawuli wezobugcisa endixelela ukuba bonzakele – ndinike ingxelo kagqirha! Kwaye ke ugqirha wethu uya kugqiba ukuba ngaba balimala okanye hayi.
“Ndiyaxolisa kakhulu kodwa andizithandi izinto ezinje kwaye ndithi mandicinezele ezinye izinto. Kufuneka basibize bathi, ‘jonga, le yingxaki kumdlali kwaye le yingxelo yezonyango’.
“Abayenzanga loo nto, ke kum bafanelekile. Okokugqibela.”
Xa kuthethwa ngoBroos malunga nokuba ukhe weva na abadlali beSundowns abangahambiyo, uye wawakhaba ngawo omane loo marhe evakalisa ukuphoxeka kwakhe ngale meko.
“Andinalo olo lwazi, ndilindele abadlali abasixhenxe beSundowns abalapha ngokuhlwanje enkampini,” wongeze watsho.
“Ndive amanye amarhe [abadlali abangahambiyo]. Ndifunde into yomqeqeshi uRulani owathi ‘aba badlali abafanelekanga’.
“Kutheni ethetha noonondaba nje? Kutheni abasebenzi bezonyango beSundowns bengaqhagamshelani noogqirha bethu? Kutheni bengabaxeleli ‘le ngxaki kwaye le yingxelo yezonyango? Jonga, abo badlali abafanelanga kwaye baphile kakuhle’.
“Kodwa abazange benze njalo, bathetha nje noonondaba. Ndiyaxolisa kakhulu, kodwa andiyikholelwa into esemaphepheni. Lo ngumcimbi obaluleke kakhulu, kufuneka uthethe nogqirha hayi kumaphephandaba.
“Ndiyaxolisa kakhulu, kodwa ndikhathazekile ngolu hlobo lolwazi.”
IBafana Bafana iqubisana ne-Andorra kumdlalo wobuhlobo ngoLwesine, phambi kokuba baqubisane ne-Algeria kwiintsuku ezintlanu emva koko njengenxalenye yeFIFA Friendlies Series.
