Igqala leqela licebisa iChiefs ngo Mosimane

Owayesakuba ngumdlali weKaizer Chiefs, uMohammed Auseb, uphonononge iimbono zakhe ngamarhe anxulumanisa umqeqeshi uPitso Mosimane neli qela lizinze eNaturena.

Le ndedeba iyavumelana nabo bacinga ukuba kufuneka kwenziwe utshintsho kwiqela lezobugcisa kwaye iyayixhasa into yokuba uMosimane makaqeshwe.

“Ndikholelwa ekubeni iKaizer Chiefs akufunekanga imbaleke umqeqeshi uPitso Mosimane, kwaye kufuneka imbuyise ekhaya ngoba imdinga kakhulu ngoku,” utshilo uAuseb.

“Ukuba bathathe uMosimane bazakufumana iziphumo ezihle ngoba uyabazi abadlali boMzantsi Afrika kwaye uyalwazi ulwimi lwabo lwebhola ekhatywayo.

“Umqeqeshi uPitso uyayazi indlela yokumanyanisa abadlali kwiqela elimanyeneyo nelithi ekugqibeleni libe yinto eyoyikwayo ngenxa yokuzimisela.”

Le ndedeba yokuzalwa eNamibia ibivakala ngathi ilahle ithemba kule sizini.

Yiyo lo nto ekholelwa ukuba uMosimane kufuneka aqale ukwakha kwiisizini ezilandelayo.

“Ukuba bayamfumana ngoku kungakuhle ngoba iqela lingasebenzisana xa kuphela le sizini, kwaye kwisizini ezayo aqalise ukuphumelela iindebe,” wongeze watsho uAuseb.

“UMosimane uyayiqonda into yokuba amaqela aphathwa ngendlela efanayo, ebekhe waqeqesha amaqela ahlukeneyo afana neSuperSport United, Mamelodi Sundowns, Al Ahly.

“Abaphathi beChiefs nabo bamqonda kakuhle ukuba uluhlobo luni lomqeqeshi uMosimane kwaye ufuna ntoni kubo.

“Abadlali beKaizer Chiefs okwangoku bangenza umsebenzi omhle phantsi kukaPitso Mosimane, njengoko ndimazi ngexesha lakhe kwiSuperSport United.

FUNDA KWAKHONA :Inkwenkwezi yeBafana ivuma ukuba ukuxhuzulwa kwamanqaku ibuhlungu

“UNasreddine Nabi uwenzile umsebenzi wakhe wade waphumelela neNedbank Cup, kodwa makahambe avule indawo uMosimane,” utshilo uAuseb.

SIFUMANE KUFACEBOOK :Imidlaloyoluntu.facebook.com

UNabi okwangoku unqunyanyisiwe kwiChiefs, kwaye kuyaqondwa ukuba iingxoxo ziyaqhubeka malunga nokuhamba kwakhe kunye nembuyekezo.