Kusele kancinci iHighbury iwele umgca

Usuku lwesithathu lwemidlalo ye-ABC Motsepe League National Playoffs ka-2024 beluzaliswe ziimvakalelo njengoko amaqela epakishe imigodlo yawo okanye eqhubela phambili ukuya kumdlalo owandulela owamagqibela kankqoyi wetumente yonyuselo. 

INjampela FC iphumelele uGroup A ngamanqaku amane emva kokubetha iFN Rangers ngo’2-1 kumdlalo wokuvula.

I-Kruger United ikwazile ukuya kumdlalo owandulela owamagqibela kankqoyi njengabaphumeleleyo kuGroup C ngamanqaku amane ngelixa iDondol Stars yakhutshelwa ngaphandle emva kokuba ibambene ngo’2-2 neNC Pros kumdlalo wesibini.

IHighbury yaseGqeberha ihleli enkcochoyini kuGroup B ngamanqaku amabini ukuze ifumane indawo kumdlalo owandulela owamagqibela kankqoyi, ngelixa iThames (NW) ikwazile ukuya kumdlalo owandulela owamagqibela kankqoyi, emva kokubetha iMangaung United ngo’1-0 kumdlalo wokugqibela wamaqela.

Imidlalo eyandulela owamagqibela kankqoyi izakudlalwa ngoLwesihlanu apho iThames iqubisana neKruger United (Mpumalanga) ngentsimbi yeshumi elinanye ngentsasa kumdlalo wokuqala owandulela owamanqam ngelixa iHighbury (EC) iza kuvana neNjampela (KZN) ngentsimbi yesithathu.

Abaphumeleleyo kumdlalo owandulela owamagqibela kankqoyi bazakufumana ukunyuselwa kwinqanaba lokuqala lebhola ekhatywayo yoMzantsi Afrika, exhaswa yiMotsepe Foundation.

Abo bafikelele kumagqibela kankqoyi baza kuqubisana ngeCawe.

Yonke imidlalo izakudlalwa eMxolisi Dicky Jacobs Stadium kwaye izakuboniswa kwiSABC Sport.