Kuthiwa iKhosi alipheli Moya kodwa iChippa yathi uyaphela apha kuthi

UBienvenu Eva Nga ufake igowuli lokuvula ngentloko ebinamandla ebigotywe ngomzuzu wamashumi amabini, ngelixa uSinoxolo Kwayiba efake inqaku lesibini kwimizuzu elishumi elinesibini emva koko.

Ngaphambili iChiefs ibibonakalise injongo zokufumana inqaku kuqala ngo-Edmilson Dove ephulukene namathuba amabini kwimizuzu emihlanu yokuqala.

URanga Chivaviro naye ufumene amathuba amabini, elinye libanjwe nguDarren Johnson, oqale umdlalo kwiChippa endaweni kaStanley Nwabali.

Kwisiqingatha sesibini iChippa iqhubekile nomfutho wayo u-Ayabulela Konkqobe ephantse ukufumana inqaku lesithathu ngomzuzu wamashumi amahlanu anesithoba. Emva kwemizuzu emine iChiefs ifumene ithuba lokutsala elinye kodwa uJohnson wamkhanyela uChristian Saile.

UJohnson uphinde wabamba ibhola nhomzuzu wama-72 uDove ezingela ephethe ityuwa.

Esi siphumo sibona iChiefs ikwindawo yesibhozo ngamanqaku angamashumi amathathu kumashumi amabini anesithathu, ngelixa iChippa ikwindawo yeshumi kwimidlalo elinganayo.

Kusenjalo, umqeqeshi weChiefs, uCavin Johnson, wenze iinguqu ezisixhenxe kwiqela eliqale neStellenbosch FC kwasala uBruce Bvuma, uPule Mmodi, uGiven Msimamgo noDove.